Shpenzimet e studentëve, monitorimi i “Guxo”: Mjekëve të rinj u duhen mbi 6 mln lekë të reja që të shkollohen

Organizata studentore “Guxo” ka zhvilluar një monitorim mbi shpenzimet që kanë studentët e mjekësisë në Shqipëri, dhe koha që u duhet të punojnë për të rikuperuar këto shpenzime.

Sipas të dhënave të “Guxo”, duke përfshirë dhe specializimin, një student i mjekësisë duhet të shpenzojë rreth 6 milionë lekë të reja, ndërsa për ta marrë mbrapsht këtë shifër, një mjek duhet të punojë rreth 8 vite në profesion.

Aktivistja e organizatës “Guxo”, Mersi Shehu tha për Euronews Albania se studimi i bërë në bashkëpunim me studentët dhe specializantët e mjekësisë, tregon se kostot e studimit për ta janë të papërballueshme dhe nuk e justifikojnë atë çka do të marrin në vendin e punës, të paktën për 8 vitet e para.

Kjo sipas saj ka ndikuar në largimin masiv të mjekëve nga Shqipëria. Ajo sugjeroi marrjen e masave për subvencionimin e një pjese të kostove që u duhet të paguajnë këta studentë, në mënyrë që të rritet motivimi tek ata.