Shpërthen makina në lëvizje, dëmtohen 4 anëtarë të një familjeje në Kamëz

4 persona, anëtarë të një familjeje janë dëmtuar lehtë pasi automjeti me të cilin udhëtonin ka shpërthyer teksa ishte në lëvizje.

Ngjarja ka ndodhur mbrëmjen e së enjtes në Institut, afër rrethrrotullimit, ku automjeti me drejtues shtetasin O. N., banues në Kamës, dyshohet se si pasojë e rrjedhjes së gazit ka shpërthyer në lëvizje e sipër.

Në automjet udhëtonin së bashku me drejtuesin e automjetit edhe bashkëshortja shtetasja M. N., me dy fëmijët tyre të mitur.

Si pasojë janë dëmtuar lehtë jashtë rrezikut për jetën  të katër personat që ndodheshin në automjet dhe pas marrjes së mjekimit janë larguar në banesë.

Nga veprimet e para hetimore të kryera nga grupi hetimor dyshohet se shpërthimi ka ardhur nga rrjedhja e gazit të makinës, si pasojë e një defekti në impiantin e gazit.

Grupi hetimor nën drejtimin e Prokurorisë po vijon veprimet për sqarimin e plotë të rrethanave të ngjarjes.