Shpërthim i fuqishëm në Pakistan, treni del nga shinat duke lënë 27 të plagosur

Të paktën 27 persona mbetën të plagosur pasi një shpërthim i fuqishëm nxori nga shinat një tren mallrash në jugperëndim të Pakistanit, raportuan zyrtarët dhe mediat lokale të dielën.

Ngjarja ndodhi pranë një linje hekurudhore në Quetta, kryeqyteti i provincës Balochistan, ku treni po lëvizte drejt zonës së kantonmentit të qytetit.

Sipas mediave lokale, pas shpërthimit u dëgjuan edhe të shtëna të shumta me armë zjarri, ndërsa autoritetet shpallën gjendje emergjente në disa spitale të qytetit për trajtimin e të plagosurve.

Zyrtari provincial, Babar Yousafzai, deklaroi se forcat e sigurisë dhe ekipet e shpëtimit mbërritën menjëherë në vendngjarje, ndërsa policia po heton natyrën e shpërthimit.

Deri tani, asnjë grup nuk ka marrë përgjegjësinë për sulmin.

Provinca e Balochistanit, e pasur me minerale dhe pjesë kyçe e China-Pakistan Economic Corridor, është përballur prej vitesh me sulme dhe aktivitete të grupeve separatiste militante.