“Shqipëria në punë”, Basha shpalos planin ekonomik: Çmontojmë konkurrencën e pandershme

Kryetari i Partisë Demokratike, Lulzim Basha ka zhvilluar një takim me përfaqësues të Shoqatës së Investitorëve të Huaj.

Lajmin e ka bërë publik vetë kryedemokrati Basha në faqen e tij zyrtare në “Facebook”, ndërsa thotë se prioritet i tij kryesor kur të vijë në pushtet do jetë përthithja e investimeve të huaja, si e vetmja mundësi që garanton rritjen e punësimit.

Përfaqësuesit e Shoqatës së Investitorëve të Huaj siç thotë Basha janë ankuar për konkurrencën e pandershme, korrupsionin, informalitetin dhe burokracitë e tepruara.

“Nuk ka prioritet më te madh për shqiptarët sot, se të kthejmë besimin të ekonomia e të nxisim punësimin si emergjencë kombëtare!Për këtë arsye, krijimi i lehtësirave dhe kushteve për të thithur sa më shumë investime të huaja, që hapin vende pune, është prioriteti ynë strategjik.

Gjatë takimit me drejtuesit e Shoqatës së Investitorëve të Huaj në Shqipëri, z. Constantin Von Alvensleben, President i FIAA, z. Grant Sun, anëtar Bordi i FIAA, z. Përparim Kalo, Anëtar Bordi i FIAA, z.Emil Georgakiev, Anëtar Bordi i FIAA, znj. Marinela Jazoj, Drejtore Ekzekutive e FIAA, diskutuam mbi shqetësimet e investitorëve të huaj në Shqipëri. Konkurenca e pandershme, korrupsioni, burokracia dhe informaliteti i lartë janë në krye të listës së shqetësimeve të tyre”, shkruan Basha.

Kreu i opozita shprehet se reformat që synon Partia Demokratike do t’i japin zgjidhje përfundimtare problemeve në ekonominë tonë.

“I sigurova përfaqësuesit e Shoqatës së Investitorëve të Huaj se në qeverisjen e ardhshme thithja e investimeve të huaja do të jetë prioritet strategjik, krahas mbështetjes së biznesit e prodhimit vendas. Reformat që ne do të ndërmarrim do të çmontojnë konkurencën e pandershme, do të eliminojnë burokracitë e tepërta dhe do të luftojnë korrupsionin. Do t’i japim fund ndryshimit të papritur dhe të pakonsultuar të rregullave, duke kthyer sigurinë juridike. Politika transparente dhe afatgjatë për taksat dhe hapja e lojës duke çmontuar monopolet dhe trajtimet preferenciale do të garantojnë konkurencë të ndershme në vend të klientelizmit korruptiv të qeverisë”, shtoi Basha.

Duke këmbëngulur tek taksa e sheshtë, kryeopozitari thekson se plani i Partisë Demokratike ka si kryefjalë shtimin e vendeve të punës.

“Taksa e sheshtë 9%, heqja e taksës “Rama” mbi karburantin, eliminimi i lejeve, licencave dhe autorizimeve që pengojnë konkurrencën e lirë dhe të drejtë do të jenë hapa të menjëhershëm. Shqipëria do të shohë përpara dhe prioriteti im absolut është të luftoj për të mbrojtur dhe hapur çdo vend pune të mundshëm. “Shqipëria në punë” nuk është thjesht një moto, por një platformë reale. Me planin tonë ekonomik do të sprapsim krizën “Rama” dhe do mund të hapim vende të reja pune, të fuqizojmë ekonominë dhe të rrisim mirëqenien e shqiptarëve”, shkruan Basha.