Shqipëria gati të shkruajë historinë, 22 mijë tifozë në stadiumin “Air Albania” për sfidën me Poloninë

Sot luhet ndeshja mes Shqipërisë dhe Polonisë. Një ndeshje direkte për vendin e dytë në grupin eliminator të Botërorit Katar 2022, ku një fitore do të na afronte ndjeshëm me objektivin. Trajneri Edi Reja doli ditën e djeshme në konferencën e zakonshme për shtyp, ku u përpoq të largojë presionin nga të tijtë, ndërsa në seancën e pasdites hodhi dritë edhe mbi formacionin me të cilin Shqipëria do të zbresë në fushë nesër në orën 20:45.

Tekniku Italian pritet të bëjë katër ndryshime, tre prej të cilave të detyruara dhe një për zgjedhje teknike të tij. Mungojnë Berat Gjimshiti, i cili u dëmtua në Budapest, por edhe mesfushori Endri Çekiçi, i cili ka plotësuar numrin e kartonëve dhe sulmuesi Sokol Cikalleshi, i cili ka rezultuar pozitiv ndaj koronavirusit në testet zyrtare të UEFA-s.

Nedim Bajrami do të luajë nga minuta e parë në vendin e Çekiçit të pezulluar. Edhe në repartin e sulmit priten ndryshime, pasi Rey Manaj do të zëvendësojë Cikalleshin dhe krah tij do të luajë titullar Armando Broja.

Forma e tij e mirë, me tre gola dhe dy asiste në 81 minuta të luajtura në tre ndeshjet e fundit, ka bërë që trajneri Edi Reja të mos e lërë sërish në pankinë, aty ku ndaj Polonisë do të ulet beratasi Myrto Uzuni, i cili do të ketë mundësinë të tregojë vlerat e tij në ndeshje e sipër.