Shqipëria mbyll përgatitjet, kuqezinjtë gati për miqësoren me Katarin

Kombëtarja shqiptare i ka dhënë fund përgatitjetve për miqësoren e radhës, atë ndaj Katarit e cila do të luhet ne Spanjë. Kuqezinjtë përgjatë dy ditëve të fundit janë stërvitur fillimisht në qytetin e Durrësit dhe më pas në Rrogozhinë në ‘Arena Egnatia’.

Grupi është stërvitur i plotë, ndërsa shqetësime ka pasur vetëm mesfushori bardheblu i grumbulluar nga Reja, Ardit Deliu.

Këtë të martë skuadra niset drejt Spanjës, aty ku përgjatë pasdites do të zhvillohet dhe seanca stërvitore në stadiumin ku do të mbahet ndeshja. Kujtojmë se dy futbollistët Arlis Shala dhe Kristal Abazaj janë të vetmit të grumbulluar që nuk aktivizohen në Superligën Shqiptare. Dyshja kanë qenë të fundit që i janë bashkuar skuadrës në prag të miqësores.

Ashtu si ndaj Arabisë Saudite, trajneri Reja ka eksperimentuar duke thirrur një numër të madh lojtarësh të kampionatit vendës.

Ndërkohë në ditët në vijim kuqezinjtë kanë dhe dy përballje të tjera për të luajtur në Air Albania. Fillimisht ajo ndaj Italisë në 16 nëntor dhe me Armeninë 3 ditë më pas.