Shqipëria i nis mbarë eliminatoret e “Katar 2022”, fiton minimalisht ndaj Andorrës

Një gol nga Ermir Lenjani i ka mjaftuar përfaqësueses së Shqipërisë për ta nisur me fitore edicionin e kualifikuesve të kampionatit botëror “Katar 2022”.

Skuadra e Edoardo Rejas triumfoi minimalisht në përballjen e së enjtes në transfertë ndaj Andorrës, duke koleksionuar trepikëshin e parë, ndaj një kundërshtari mjaft modest. Pavarësisht cilësisë që ka skuadra kuqezi në fushën e lojës diferencat ishin të vogla, me vendasit që krijuan pak hapësira.

Lenjani shfrytëzoi maksimalisht një pasim të gjatë të Keidi Bares. me një goditje potente, 31-vjeçari mposhti portierin vendas duke u kthyer në heroin e kuqezinjve, të cilët, pavarësisht i insistimit, nuk mundën që të shënonin më në portën e Andorrës.

Skuadra kuqezi do të ketë dhe dy ndeshje të tjera këtë muaj, ku fillimisht do të presë Anglinë në Air Albania këtë të diel, ndërsa tre ditë më vonë do të luajë në transfertë me San Marinon. Kuqezinjtë ndodhen në grupin I, ku ndodhen dhe Polonia dhe Hungaria.