Shqipëria pjesë e traktatit botëror për pandeminë, bashkëpunim për të përballuar emergjencat

Një traktat ndërkombëtar është përgatitur nga ana e më shumë se 20 liderëve botërore dhe OBSH-së për të ndihmuar në përballimin e  emergjencave shëndetësore siç ishte edhe pandemia e COVID-19 e cila ka gjunjëzuar  gjithë globin.

Pjesë e tij është edhe Shqipëria. Ideja e një traktati të tillë, i cili do të siguronte qasje universale dhe të barabartë në vaksinat, ilaçet dhe diagnostikimet për pandemitë, u paraqit nga kreu i Këshillit Evropian, Charles Michel në një samit të G20 nëntorin e kaluar.

Qëllimi kryesor i një traktati të tillë është forcimi i rezistencës mbarëbotërore ndaj pandemive të ardhshme përmes sistemeve më të mira të alarmit, ndarjes së të dhënave, hulumtimeve , prodhimit dhe shpërndarjes së vaksinave, ilaçeve duke e vënë theksin tek bashkëpunimi dhe fryma e solidaritetit. Krahas Gjermanisë, Francës, Britanisë, OBSH pjesë e tij janë edhe Shqipëria, Greqia, Serbia, Rumania, Holanda, Spanja, Norvegjia, Senegali etj.

“Do të ketë pandemi të tjera dhe urgjenca të tjera të mëdha shëndetësore. Asnjë qeveri e vetme ose agjenci shumëpalëshe nuk mund ta trajtojë këtë kërcënim vetëm, Çështja nuk është nëse, por kur.,” shkruajnë udhëheqësit në një artikull të publikuar në gazetat kryesore spanjolle, britanike e franceze siç është ”Le monde”.

Traktati gjithashtu nënvizon se shëndeti i njerëzve, kafshëve dhe planetit janë të gjithë të lidhur dhe duhet të jenë  përgjegjësi e përbashkët, duke kërkuar transparencë dhe bashkëpunim global.

“Ne jemi të bindur se është përgjegjësia jonë, si udhëheqës të kombeve dhe institucioneve ndërkombëtare, të sigurojmë që bota të mësojë nga  pandemia COVID-19, duhet ta shfrytëzojmë këtë mundësi dhe të bashkohemi si një komunitet global për bashkëpunim paqësor që shtrihet përtej kësaj krize”, shkruajnë udhëheqësit.

Një marrëveshje e tillë krahasohet me traktatin e arritur pas Luftës së Dytë Botërore dhe është e nevojshme për të ndërtuar bashkëpunimin ndërkufitar.