Shtatori me temperatura pranvere, java pritet me mot të kthjellët

Meteorologu i Meteoalb Hakil Osmani tha për Euronews Albania se prezencat e vranësirave gjatë mesditës së të shtunës do të shtohen në gjithë territorin, ndërkohë që dita e diel do të karakterizohet nga reshjet.

Sipas meteorologut reshjet më të shumta do të jenë në kufi me Greqinë. Sa i takon temperaturave në fundjavë, ditën e shtunë do të jenë deri në 32 gradë Celcius dhe një rënie e ndjeshme do të shënohet përgjatë ditës së diel.

Moti në javën që vjen do të nisë me reshjet e të hënës ndërsa e marta dhe në vijim do të ketë mot të kthjellët dhe të qëndrueshëm.

Pavarësisht se kemi hyrë në stinën e vjeshtës, temperaturat sipas Osmanit do të jenë si ato të pranverës, duke arritur edhe në 34 gradë Celcius.