Shtimi i rasteve ditore me COVID-19, RMV shton kufizimet

Qeveria e Maqedonisë së Veriut ka vendosur masa të reja shtrënguese për qytetarët për shkak të numrit të lartë të personave të infektuar me COVID-19 gjatë ditëve të fundit.

Sipas ministrit të Shëndetësisë, shifrat në rritje kanë ardhur për shkak të tubimeve për festime të ndryshme familjare dhe shoqërore. 

Në këtë kuadër, është vendosur të ndalohen tubimet për festa nëpër shtëpi, por edhe të ndalohet ardhja e më shumë se katër personave në ambientet e shtëpisë. 

Masë shtesë është vendosur edhe ndalesa për tubime e më shumë se katër personave kudo nëpër hapësira publike, qoftë në stacione benzine apo edhe parqe. 

Maskat mbeten kusht për cilëndo hapësirë publike, ndërsa përjashtim nga ky detyrim kanë vetëm fëmijët deri 6 vjeç dhe sportistët gjatë stërvitjes.