Zbulohen detaje nga planet e 5 grabitësve të vilave luksoze në Tiranë

Gjykata e Tiranës, caktoi masën e sigurisë, arrest me burg për pesë personat e arrestuar si pjesë e një grupi grabitësish.

Fillimisht seanca u shty  për 45 minuta dhe shkak për këtë u bë kërkesa e avokatëve mbrojtës për t’u njohur me fashikujt e dosjes.

Gjyqatari Ardian Kalia pranoi  kërkesën e mbrojtjes duke i dhëne 45 minuta kohë për t’u njohur me dosjen, ku më pas kur seanca u zhvillua, u morr vendimi për masën e sigurisë arrest me burg.

Tre ditë më parë përfunduan në pranga  5 persona. Ata  koordinoheshin mes tyre për vjedhjen e vilave përmes google maps, ku  Hektor Qirjazi (i njohur edhe me emrin Dorjan Lamani ) u dërgonte  pjesëtarëve të tjerë të grupit  Dajvid Dosti, Klodian Çypi, Halil Topalli, Redian Begaj, (të gjithë të arrestuar)  vendndodhjen e vilave luksoze që do të grabisnin.

Euronews albania ka siguruar dosjen e plote hetimore ku sipas saj, ky grup personash me precedentë të mëparshëm penale ishte nën vëzhgim nga policia prej 2 muajsh dhe informacioni ishte se do të grabisnin një pikë këmbimi valutor.

Po ashtu dyshimet janë se ky grup po përgatiste edhe vjedhjen e banesës së një zyrtari të lartë ku mendonin se do të gjenin shuma të mëdha parash.