Si nisi përplasja Duka – Veliaj?

Zgjedhjet e 2 Marsit për presidentin e Federatës Shqiptare të Futbollit kanë nxitur përplasje të forta mes presidentit aktual të FSHF, Armand Duka dhe kreut të Bashkisë Tiranë Erion Veliaj.

Cfarë ka ndodhur dhe përse vjen kjo përplasje?

Më 2 mars, Armand Duka kandidon për një mandat të gjashtë si president i Federatës Shqiptare të Futbollit.

Kjo për Erion Veliajn është e papranueshme. Ndaj u investua për ta zëvendësuar atë.

Bashkia Tiranë ka 34% aksione të Klubit të Futbollit të Tiranës, pjesë e Shoqatës Rajonale të Futbollit të Tiranës. Kjo e fundit ka dhe numrin më të madh të votave për president të FSHF.

Veliaj nisi përpjekjet për largimin e Dukës nga FSHF, duke i kërkuar antarëve të Shoqatës Rajonale të Futbollit Tiranë, të votojnë Eduard Prodanin për kryetarin e saj.

“Aty është noteri. Firmosim. Jo FIFA dhe UEFA, po Jezusi me Muhamedin të zbresin, nuk e ndalin dot këtë”, tha Veliaj.

FSHF publikoi një audiopërgjim të takimit, të cilin Veliaj e konfirmoi pa asnjë problem.

 “Jeni në këtë sallë 40 vota, nga 56 që janë nesër. Unë me këtë sallë fitoj Tiranën dhe gjithë Shqipërinë jo më marr një shoqatë të vogël”, shtoi ai.

Në 23 Janar, një ditë përpara zgjedhjeve të Shoqatës Rajonale të Tiranës, Bashkia Tiranë njoftoi angazhimin e një grupi juristësh, për të denoncuar në SPAK dhe ndërkombëtarisht Armando Dukën.

Një ditë më vonë, kur mbaheshin votimet për kreun e Shoqatës, Prokuroria e Tiranës njoftoi nisjen e hetimit për Dukën, me akuzën për vjedhje dhe shpërdorim detyre.

Zgjedhjet u zhvilluan. Kandidati i mbështetur nga Veliaj humbi. Votimet i quajti të manipuluara.

Ndërkohë përplasja mes presidentit të FSHF dhe kreut të Bashkisë Tiranë vijon. Veliaj paralajmëroi kallëzim penal për funksionarë të FSHF. Kjo e fundit u ankua tek FIFA për ndërhyrje dhe kërcënime nga politika.

LEXONI GJITHASHTU:

• Ekskluzive/ Euronews Albania siguron foton e personit të maskuar që vuri tritolin tek banesa e Dukës
• Shpërthim tritoli në shtëpinë e Armand Dukës