Siri: Përleshje të reja midis forcave qeveritare dhe kurdëve pavarësisht armëpushimit të një dite më parë

Përleshje të reja midis forcave të Damaskut dhe luftëtarëve kurdë janë regjistruar orët e fundit në Siri, pavarësisht marrëveshjes së së dielës për një armëpushim midis dy palëve.

Forcat qeveritare njoftuan se po zhvilloheshin luftime me forcat kurde dhe “mbetjet e regjimit të Bashar Al-Assad”, të cilët “kërkojnë të përmbysin marrëveshjen”. Sipas agjencisë shtetërore të lajmeve siriane, tre ushtarë u vranë .

Sipas luftëtarëve kurdë, përleshjet me forcat qeveritare siriane po zhvillohen pranë një burgu ku mbahen anëtarët e ISIS-it në periferi të qytetit të Rakas , në pjesën veriore të vendit.

Forcat Demokratike Siriane (SDF) i përshkruan përleshjet si një “zhvillim jashtëzakonisht të rrezikshëm” dhe thanë se kapja e burgut nga forcat qeveritare “mund të ketë pasoja serioze për sigurinë, të kërcënojë stabilitetin dhe të hapë rrugën për një kthim në kaos dhe terrorizëm”.