Situata e COVID në vend, Policia: Respektoni masat që mos të kalohet në një mbyllje tjetër

Pandemia e coronavirus-it po detyron disa shtete të shkojnë drejt izolimit të plotë dhe të tjera të marrin masa kufizuese shtesë për shkak të përhapjes së sëmundjes.

Ndërkaq në vendin tonë gjatë dy ditëve të fundit shifrat e COVID-19 kanë pësuar rënie.

Shifrat më të ulëta janë shoqëruar po ashtu nga një ulje e ndjeshme e numrit të testimeve ditore.

Në 24 orët e fundit Ministria e Shëndetësisë ka njoftuar se 2100 të testuar kanë rezultuar pozitiv 661 persona.

Deri më tani 1016 persona kanë humbur jetën si pasojë e COVID-19 dhe mes tyre mbi 20 mjekë.

Protestat për vrasjen e 25-vjeçarit, Klodian Rasha, janë konsideruar me rrezikshmëri të lartë edhe për përhapjen e virusit.

Grumbullimet masive ndaj të cilave janë marrë dhe masa administrative për qytetarët kanë bërë që Policia të apelojë për respektimin e protokolleve anti-COVID në të kundërt një mbyllje e dytë do të jetë e detyrueshme.