Situata në Shkodër, bllokohet qarkullimi në fshatin Obot! 15 familje të bllokuara në Bushat

Situata në territorin e Qarkut Shkodër paraqitet kryesisht e qëndrueshme dhe nën kontroll. Reshjet e shiut kanë pushuar prej disa orësh dhe deri në këto momente nuk raportohen situata emergjente.

Mësohet se ende ka prani te ujit ne disa zona tokë bujqësore. Në zonën e Obotit, në rrugën kryesore evidentohet prani uji rreth 30-40 cm, çka lejon qarkullimin vetëm për mjete të larta. Gjithashtu ka prezencë uji në disa oborre banesash dhe në sipërfaqe toke bujqësore.

Përroi i Glinës po shfaq tendencë rënieje të nivelit të ujit. Përroi i Gjadrit ka shënuar rënie të nivelit të ujit dhe situata vijon të monitorohet nga strukturat e Emergjencave Civile. Në Bushat, në fshatrat Mal i Jushit dhe Hoten janë raportuar se rreth 15 familje jenë të bllokuara nga prezenca e ujit.

Sipas të dhënave të Drejtorisë së Ujitjes dhe Kullimit Lezhë, niveli i ujit në Urën e Bunës është 1.80 m, niveli i Liqenit të Shkodrës ndodhet në kuotën 7.7 m dhe niveli në Dajç në kuotën 6.2 m.