S’ka kthim në sistemin e mëparshëm të reformës territoriale, deklaron Basha

Partia Demokratike nisi sot procesin e konsultimeve për reformën territoriale.

Në një takim ku pjesë ishin ekspertë të fushës, kryetari Lulzim Basha e konsideroi rindarjen territoriale e Shqipërisë si një nevojë urgjente.

“Ne nuk jemi për kthim për sistemin e mëparshëm, besojmë se ishte tepër i fragmentuar, 370 e sa njësi. Vullneti ynë politik ka bërë të mundur krijimin e këtij komisioni. Unë e di që puna në këtë komision nuk do të jetë lehtë përkundrazi do të kemi vizione antagoniste përballë njëri-tjetrit. Por koha na ka dhënë të drejtë, koha ka provuar se 2015 ishte fillimi i një katastrofe për qytetarët,” – deklaroi Basha.

Partia Demokratike do të nisë një tur konsultimesh me qytetarët në 12 qarqe të vendit. Pak ditë më parë, PD ngriti grupin e punës të kryesuar nga Roland Bejko dhe pritet që seancën e ardhshme në Kuvend të miratohet përbërja e komisionit të posaçëm parlamentar.

Për herë të fundit ndarja administrative e Shqipërisë është bërë në vitin 2015, por asokohe Partia Demokratike e bojkotoi komisionin që drejtohej nga Bashkim Fino.

Ndërkohë, Rama në një intervistë për VOA u shpreh se duhet të ketë më pak njësi vendore.

LEXONI GJITHASHTU:

• PD nis sot konsultimet për reformën territoriale