Skemat mbështetëse për bujqësinë dhe blegtorinë, fermerët e painformuar, kërkojnë ndihmë nga shteti

Fermerët nga Tirana, Fieri dhe Korça kanë numrin më të lartë të aplikimeve për grantet mbështetëse për investime në bujqësi dhe agro-industri, megjithatë Shqipëria është vendi që arrin të përfitojë më pak në rajon, nga fondet e BE-së.

Ndërkohë që jemi në thirrjen e dytë të IPARD, program mbështetjeje nga Bashkimi Evropian dhe qeveria shqiptare për mbështetjen e investimeve në sektorin agro-ushqimor, vihet re një numër i pakët i aplikimeve në krahasim me fermerët realë.

Vullnet Gjallosha, drejtori i agjencisë rajonale të bujqësisë shprehet se Korça është një ndër qarqet më të suksesshëm në krahasim me qarqet e tjera, me 72 aplikantë.

“Në thirrjen e dytë të skemës së IPARD, specialistët e bujqësisë e kanë dhënë informacionin e duhur në çdo njësi administrative, sepse kemi në çdo njësi specialistë”, thotë ai.

Nga ana tjetër fermerët, teksa i gjen duke punuar, shprehen se nuk e kanë idenë mbi këtë projekt dhe se askush nuk i ka informuar.

“Nuk na ka ardhur asnjë njeri deri më sot, nuk na kanë pyetur”, thotë një fermer.

Fermerët kërkojnë ndihmën konkrete nga shteti për një treg të posaçëm për qumështin, uljen e çmimeve të plehrave kimike si dhe uljen e çmimit të naftës.

“Specifike është tregu i qumështit të lopës, se nuk e shesim dot, shumë pak, ose dhe patatja që sivjet u hodh. 2020 dhe ja siç e shikon me kazmë e me shat”, thotë fermeri.

Programi IPARD ofron një mbështetjeje prej 94 milionë euro me prioritet investimet në sektorin agro-ushqimor si dhe përmirësimin e konkurrencës.