S’mori mandatin e deputetit, Hajdari: Kanë triumfuar politikanët e lidhur me krimin e organizuar

Kandidatja për deputete e “Nisma Thurje” në qarkun e Elbasanit, Rudina Hajdari ka reaguar pasi nuk siguroi mandatin e deputetit.

Nëpërmjet një postimi në rrjetet sociale, Hajdari shprehet se nga rezultati i zgjedhjeve tregoi se kanë triumfuar politikanët e lidhur me krimin e organizuar.

“Personazhe anonimë, të cilët nuk njihen në publik, nuk kanë artikuluar kurrë asnjë ide politike, nuk kanë asnjë vlerë përveç lidhjes me botën e krimit, po rezultojnë si njerëz të votuar nga qytetarët. Unë refuzoj të besoj se shqiptarët duan të drejtohen nga organizata kriminale, por e di se shumë shqiptarë nuk votojnë dot të lirë për shkak të varfërisë apo presionit e shantazhit”, shkruan Hajdari.

Ajo thekson se edhe në 4 vitet e ardhshme do të vazhdojë që të qëndrojë pranë qytetarëve dhe do të luftojë për shqiptarët dhe Shqipërinë.

“Ne humbëm një betejë por jo luftën. Luftën do e fitojmë me shqiptarët e për Shqipërinë. Do të vazhdojmë! Faleminderit sërish dhe rishihemi shumë shpejt”, përfundon Hajdari.

Lexoni gjithashtu:

Live Blog: Kandidatët që sigurojnë mandatin e deputetit