Sondazhet nxjerrin Makronin fitues në zgjedhjet në Francë

Presidenti francez Makron po kërkon një mandat të dytë presidencial në Francë, duke u mbështetur në rimëkëmbjen e vendit pas COVID-19 dhe përpjekjet e tij diplomatike për paqe në Ukrainë.

Me më pak se dy javë nga raundi i parë i votimit, Makron ka një epërsi të lehtë në sondazhet e opinionit publik. Por, anketuesit paralajmërojnë se abstenimet mund të arrijnë një nivel rekord, e në këto kushte Makroni duhet të nxisë përkrahësit që të dalin e të votojnë.

Makroni pritet të udhëheqë raundin e parë të zgjedhjeve presidenciale të Francës me 28%, e në vend të dytë pritet të dalë rivalja e ekstremit të djathtë Marine Le Pen me 20%, dhe pretendenti i tretë është ekstremisti i majtë Jean–Luc Melenchon me 15%.

Duke u mbështetur në programin e tij të reformës ekonomike, fushata e Makronit ofron vizionin e një France më të fortë, të përfshirë në transformimin ekologjik dhe ekonomik.

Fraksioni i qendrës së majtë brenda partisë së Makronit është  i shqetësuar se masat e vetme që votuesit do të mbajnë mend nga manifesti i tij janë të vështira dhe jopopullore, si shtyrja e moshës së pensionit në 65 vjeç.

Reformat e pensioneve të Makronit ishin shumë të papëlqyeshme gjatë gjithë mandatit të tij. Protestat e jelekë-verdhëve, fillimisht një protestë kundër çmimeve të larta të karburantit, u shndërruan në një lëvizje kundër Makronit që e pasqyruan atë si elitar dhe të shurdhër ndaj ankesave të njerëzve të zakonshëm.

Por menaxhimi i  krizës së COVID, veçanërisht mbështetja ekonomike për bizneset, i dha shumë pikë.

“Makroni do e ketë më të lehtë të fitojë zgjedhjet, sesa të menaxhojë një mandat të dytë”, thonë analistët në Francë.

LEXONI GJITHASHTU:

• Nis fushata presidenciale në Francë
• ‘Kanë frikë nga Rusia”, Zelenksi kritikon Macron