Sot pritet që kuvendi i Kosovës të miratojë buxhetin e vitit 2021

Sot deputetët e Kuvendit të Kosovës do të  mblidhen për të votuar buxhetin e vitit të ardhshëm (2021) dhe disa marrëveshje ndërkombëtare.

Kuvendi i Kosovës ka njoftuar se seanca do të nisë në orën 11:00, ku do të diskutohet për ndarjet buxhetore për buxhetin e vitit 2021.

Shefi i Grupit Parlamentar të Lidhjes Demokratike të Kosovës (LDK), Arben Gashi, tha javën e kaluar se seanca plenare është thirrur me kërkesë të më shumë se 40 deputetëve.

Ndërkohë Lidhja Demokratike e Kosovës kërkon miratimin e buxhetit para mbajtjes së zgjedhjeve të reja parlamentare, pasi Kushtetuesja vendosi se vota e deputetit Etem Arifi për zgjedhjen e qeverisë Hoti në qershor ishte e pavlefshme.

Thirrje për votim të buxhetit dhe marrëveshjeve ndërkombëtare deputetëve u kanë bërë edhe kryeministri në detyrë Avdullah Hoti dhe shefi i Grupit Parlamentar të LDK-së, Arben Gashi.

Ndërkohë, Partia Demokratike e Kosovës ka bërë të ditur se do të votojë pro miratimit të buxhetit.

Lexoni gjithashtu:

Zgjedhjet, Albin Kurti: Kemi gjasa të bëhemi më shumë se 65 deputetë