‘Uria nuk taksohet’, qytetarët protestë para kryeministrisë kundër rritjes së çmimeve

Përfaqësues të shoqërisë civile dhe qytetarë të shumtë kanë zhvilluar protestën e dytë para kryeministrisë kundër rritjes së çmimeve.

Qytetarët u bëjnë thirrje institucioneve të ulin taksat dhe çmimet, pasi siç thonë ata rritja e tyre është e papërballueshme.

“Çdo muaj në shtëpinë e një pensionisti do mungojë kujdesi shëndetësor, sepse ato lekë do shkojnë për bukë”, apeluan qytetarët.

Me thirrjet “ulni taksat”, “ulni çmimet” dhe “uria nuk taksohet”, protestuesit thanë se tubimi i tyre synon jo vetëm uljen e çmimeve, por dhe rikthimin e meritokracisë dhe shanseve të barabarta mes qytetarëve.

“Kjo është një protestë kundër rritjes së çmimit të produkteve të shportës, kjo është një protestë kundër rritjes së çmimit të karburantit dhe gazit. Kjo është një protestë kundër koncesioneve. Kjo është një protestë për meritokracinë, që fëmijët e këtij vendi të mos ikin në emigrim. Protesta ka si qëllim kundërshtimin e rritjes së çmimeve për produktet ushqimore dhe karburantet”, thanë qytetarët.

Një javë më parë u zhvillua protesta e parë qytetare, në të cilën u kundërshtonte rritjen e çmimeve për mallrat e konsumit. Në protestë mbajtën fjalën edhe figura të njohura, ku ftuan qytetarët që të këmbëngulin për të drejtat demokratike, duke ngritur zërin përmes protestave.

Partia Demokratike iu bashkua protestës, teksa kreu i saj Lulzim Basha më herët ishte shprehur se PD do të mbështeste çdo lloj forme të qëndresës qytetare kundër qeverisë.

LEXONI GJITHASHTU:

• Penguan qarkullimin, hetohen 4 pjesëmarrës dhe organizatorë të protestës kundër rritjes së çmimeve
• Opozita mbështet protestën për rritjen e çmimeve, ambasada e SHBA thirrje për kujdes