SPAK në Kushtetuese: Masa e pezullimit për Ballukun është proporcionale dhe për individin, jo funksionin

Seanca në Gjykatën Kushtetuese për çështjen që lidhet me zëvendëskryeministren dhe ministren e Energjisë dhe Infrastrukturës, Belinda Balluku, është zhvilluar këtë të enjte.

Sipas SPAK, masa nuk lidhet me funksionin, por me individin, çka ka bërë që ajo të ndikojë si në rolin e zv/kryeministres, ashtu edhe në atë të ministres së Energjisë dhe Infrastrukturës.

“Masa është për individin dhe jo funksionin. Duke parë që individi mishëronte dy funksionet dhe kushtet për parandalimin në të ardhmen të veprave të tjera, do të kërkohej sepse i njëjti person ushtron të dy funksionet”, tha prokurorja Dorina Bejko.

E pyetur nëse kjo masë do të cenonte mandatin e dhënë nga sovrani apo funksionimin e Kuvendit, përfaqësuesja e SPAK u shpreh:

“Unë vlerësoj që do të cenonte mandatin e deputetit që është dhënë nga sovrani.”