SPAK nuk pati ndikimin që pritej te reforma në drejtësi, thotë juristi Hoxha

Juristi, Arbër Hoxha tha për Euronews Albania se pritej që SPAK të kishte ndikim te reforma në drejtësi por sipas tij, asgjë e dukshme nuk ka ndodhur.

Avokati cilësoi si të rëndësishëm çfarëdolloj progresi sado i vogël qoftë ai duke sjellë në vëmendje se zhvillimi i ngadaltë është më mirë se kur nuk ka zhvillim fare, ndërsa theksoi se qytetet si Tirana dhe Durrësi po e ndjejnë më shumë vonesën e reformës në drejtësi.

“Më mirë të vuajmë dhe pak, ashtu siç kemi vuajtur dhe të marrim në fund të ditës drejtësi, sesa të marrim një drejtësi të shpejtë por jo efektive. Ky është guri i themelit i reformës në drejtësi”, – u shpreh Hoxha.

Në optikën e juristit ndër zgjidhjet me optimale për situatën do ishte pranimi i më shumë kandidatëve në shkollën e magjistraturës, sepse do të ishin elementët e rinj që do të nisnin punë në shkallën e parë e nuk do të kishte të tilla vonesa. Sipas tij, alternativa tjetër mund të ishte dhe një organizim i brendshëm i gjyqtarëve aktual.

Askush nuk e thotë, por Gjykata e Lartë ka filluar të funksionojë, tha Hoxha, ndërsa shprehu dhe shqetësimin për kthimin e drejtësisë në statistikë.

Sipas tij, drejtësia duhet të jetë reale dhe të fokusohet në çështje vërtetë të rëndësishme për mbarëvajtjen e saj, ndërsa besimi i qytetarëve të drejtësia duhet të restaurohet.

LEXONI GJITHASHTU: 

• Ambasada amerikane: SHBA-ja mbështet përpjekjet e prokurorëve për të fuqizuar shtetin e së drejtës
• Ambasadorja Yuri Kim: Reforma në drejtësi duhet të vijojë, ta bëjmë atë realitet
• 400 gjyqtarë e prokurorë pa Vetting, Balla: Zgjatja e mandatit të KPK duke ndryshuar Kushtetutën me opozitën