Spotify këshilla për COVID dëgjuesve

Spotify do të shtojë këshillat sa i takon pandemisë në emisionet radiofonike që transmetohen në këtë platforme.

Vendimi erdhi pasi këngëtari Neil Young bëri kërkesë të hiqte këngët e tij nga ky aplikacion, me pretendimin se aty jepen lajme të rreme rreth COVID-19.

Në një reagim, platforma bëri me dije se dëgjuesit do të marrin të dhëna të përditësuara nga shkencëtarët, mjekët, akademikët dhe autoritetet e shëndetit publik në mbarë botën.

Po ashtu këngëtarja Joni Mitchell tha të premten se do të hiqte këngët e saj nga Spotify në shenjë solidariteti me Young.

Rreth 270 ekspertë mjekësorë i kishin shkruar një letër të hapur Spotify në fillim të muajit janar duke kritikuar emisionin radiofonik për “promovimin e teorive të pabaza ” rreth COVID-19.

Ky emision drejtohet nga Joe Rogan, dhe shpesh herë ka pasur të ftuar skeptikë rreth pandemisë dhe vaksinimit kundër COVID-19.

Madje edhe Rogan ka thënë se të rinjtë nuk duhet të vaksinohen dhe se vetë ishte mjekuar kundër coronavirusit me një ilaç për parazitët.

Spotify, që u lançua në vitin 2008, ka më shumë se 381 milionë përdorues, duke përfshirë 172 milionë abonentë.