Starmer: Kandidati i Partisë Laburiste do ketë mbështetjen time të plotë

Kryeministri britanik Keir Starmer ka deklaruar se do të mbështesë “100%” kandidatin e Partisë Laburiste në zgjedhjet e ardhshme të pjesshme në Makerfield.

Duke folur para stafit të Partisë Laburiste, Starmer tha se shumë shpejt do të dihet emri i kandidatit dhe se kushdo që të jetë, ai do të ketë mbështetjen e plotë të tij. Ai e përshkroi garën si një përballje mes Laburistëve dhe Reform UK, duke iu referuar partisë së djathtë Reform UK.

Zgjedhjet e pjesshme u shkaktuan pas dorëheqjes së deputetit laburist Josh Simons, i cili u largua nga Parlamenti pas emërimit të tij në një post procedural që i lejon ligjvënësit të japin dorëheqjen nga Dhoma e Komunave.

Sipas raportimeve, Simons më herët kishte lënë të kuptohej se mund t’i hapte rrugën ish-kryebashkiakut të Mançesterit të Madh, Andy Burnham, megjithëse ky i fundit nuk e ka konfirmuar ende kandidaturën.

Starmer gjithashtu pranoi se rezultatet e fundit të zgjedhjeve lokale kanë qenë “të vështira”, duke shtuar se votuesit janë të pakënaqur me ritmin e ndryshimeve dhe se fokusi i qeverisë mbetet përmirësimi i shpejtë i qeverisjes.