Statuja e Arnisës në SHBA? Restauruesi: Mund të bëhej fare mirë dhe këtu

Shqetësimi i mungesës së fondeve për kërkimet arkeologjike është vënë në qendër të një debati ditët e fundit, teksa deputeti Erion Braçe ka përmendur një foto që ka bërë bujë dhe ka kërkuar fonde për gërmime.

Bëhet fjalë për një thesar arkeologjik që ndryshon historinë sipas deputetit. Ai i ka bërë thirrje qeverisë që të përqendrojë fondet për kërkime, duke pohuar se “statuja ‘kalorësi mbi kalë ka 2500 vite që është e jona’.

Pas tij ka reaguar historiani Auron Tare, sipas te cilit “Shqipëria nuk ka asnjë laborator për restaurimin e këtij artifakti, por edhe mijëra të tjerave që janë zbuluar këtyre dekadave”.

“Nuk kemi mundur të bëjmë asgjë që kjo statujë e mrekullueshme të kishte mundësinë të restaurohej në vendin ku u zbulua. Shumë para janë derdhur lumë për koncerte apo gjëra të tjera pa asnjë vlerë për trashëgiminë kulturore dhe nuk janë gjetur dot asnjë kacidhe për të krijuar një laborator për të restauruar këto kryevepra”, ka apeluar Tare.

Restauruesi i njohur, Frederik Stamati tha një intervistë për Euronews Albania se është absurde që statuja të çohej në SHBA për restaurim ndërkohë që ky proces mund të bëhet fare mirë në Shqipëri.

“Një objekt arkeologjik nëse lihet zbuluar pa u trajtuar në laborator, mund të shkojë deri në pluhur. Statuja ndodhet për restaurim në SHBA. Duke parë figurën, arrij në disa njohuri për mënyrën si është duke u prishur. Kam kaluar mbi 20 mijë objekte të arkeologjisë në duar. Objektet pranë detit janë të predispozuara që të prishen më shpejt”, tha ai.

LEXONI GJITHASHTU:

• Statuja nga Vatikani në Shqipëri, Papa Françesku dhuron përmendoren për katedralen
• Statuja e Davidid pornografi? Robert Aliaj: Qesharake! Arti e tejkalon realitetin