Stërvitje ushtarake në Serbi, Vuçiç: Po forcohemi për të parandaluar çdo agresor

Gjithnjë e më shumë Serbia afirmon raportet e saj të ngushta me Pekinin dhe Moskën.

Gjatë ditës së shtunë avionë luftarakë, helikopterë dhe tanke të prodhuar në Rusi por edhe dronë kinezë zhvilluan stërvitje në rajonin perëndimor Pester në Serbi.

Stërvitja e quajtur Bashkëpunimi 2020, e ndjekur nga Presidenti Aleksandar Vuçiç dhe personalitete të tjera, nënvizoi lidhjet e ngushta ushtarake të Serbisë me Pekinin dhe Moskën.

Në vitet e fundit, Beogradi ka përshpejtuar shpenzimet e mbrojtjes ndërsa kërkon dominimin në Ballkanin Perëndimor.

Buxheti ushtarak u rrit në rreth 1.14 miliardë dollarë në 2020 dhe 2019, 43% më shumë se në 2018. Shpenzimet ushtarake të këtij viti përfaqësonin rreth 2.4 përqind të produktit të brendshëm bruto.

“Ne po forcojmë ushtrinë tonë për të parandaluar çdo agresor, nuk kemi ndërmend të krijojmë ndonjë konflikt”,- tha Vuçiç për gazetarët pas stërvitjes.

 

 

 

 

 

View this post on Instagram

 

 

 

 

 

 

 

 

 

 

 

A post shared by Александар Вучић (@avucic) on Oct 10, 2020 at 4:35am PDT

Për herë të parë, Serbia demonstroi përdorimin e dronëve luftarakë CH-92A, vendosja e parë e tillë e mjeteve ajrore kineze pa pilot në Evropë. Ajo mori gjashtë dronë të tillë në qershor.

Pekini e sheh Serbinë si pjesë të nismës së saj që synon hapjen e lidhjeve të reja të tregtisë së jashtme për kompanitë kineze që kanë investuar miliarda euro, kryesisht në kredi të buta për projekte të infrastrukturës dhe energjisë.

Për stërvitjen e së shtunës, ushtria serbe përdori mbi 40 aeroplanë, rreth 150 automjete, përfshirë tanket dhe transportuesit e blinduar, dhe rreth 2,800 trupa.

Ushtria serbe është e bazuar në ish-teknologjinë Sovjetike dhe në vitet e fundit Beogradi ka blerë aeroplanë luftarakë MiG-29 dhe armë të tjera nga Rusia, duke përfshirë helikopterët MI-35 dhe sistemin e mbrojtjes ajrore Pantsir.

Serbia, e cila është një kandidate për anëtarësim në Bashkimin Evropian, deklaroi neutralitetin ushtarak në 2006. Ajo u bashkua me programin e Partneritetit për Paqen të NATO-s, megjithëse nuk kërkon anëtarësim të plotë në aleancën e mbrojtjes perëndimore.