Stoltenberg: Kina duhet të dëgjojë Ukrainën rreth planit për paqe

Shefi i NATO-s, Jens Stoltenberg, i ka bërë thirrje të martën Pekinit që të ketë parasysh kushtet e Ukrainës për paqe me Rusinë, teksa presidenti kinez, Xi Jinping po takon presidentin rus, Vladimir Putin në Moskë.

Putin i ka thënë Xi-së se është i hapur për të diskutuar dokumentin 12-pikësh të Pekinit për konfliktin në Ukrainë, në të cilin bëhet thirrje për dialog dhe respektim të sovranitetit territorial të shteteve.

“I takon Ukrainës të vendosë se cilat janë kushtet e pranueshme për secilën zgjidhje paqësore,” – tha Stoltenberg në një konferencë për media, duke theksuar se Kina ka dështuar që të dënojë luftën e Moskës në Ukrainë.

“Prandaj Kina duhet të nisë të kuptojë perspektivën e Ukrainës dhe të angazhohet me presidentin Zelensky drejtpërdrejt, nëse dëshiron të jetë serioz për paqen,” – shtoi ai.

Shefi i aleancës ushtarake të Perëndimit, ka thënë se mirëpret propozimet që mund të çojnë në “paqe të qëndrueshme”.

LEXONI GJITHASHTU:

• Stoltenberg: Nëse Rusia fiton luftën, Kina mund të pushtojë Tajvanin
• Stoltenberg: Bahmuti mund të bjerë në ditët në vijim