Stoltenberg takon Lajçak: Mbështesim dialogun Kosovë-Serbi

Sekretari i Përgjithshëm i NATO, Jens Stoltenberg është takuar me të Dërguarin e Bashkimit Europian për dialogun Kosovë-Serbi, Miroslav Lajçak ku kanë diskutuar në lidhje me marrëveshjen për targat midis dy shteteve.

Në reagimin zyrtar të shpërndarë për media, Stoltenberg është shprehur se mirëpret marrëveshjen e fundit për uljen e situatës së tensionuar në veri të Kosovës si dhe rrugën drejt progresit, në kuadër të Dialogut Prishtinë-Beograd me ndërmjetësimin e BE.

“Misioni ynë i KFOR-it luan një rol thelbësor për të siguruar zbatimin efektiv të kësaj marrëveshje, dhe NATO mbetet e përkushtuar ndaj stabilitetit të rajonit të Ballkanit Perëndimor”, shtoi ai.

Stoltenberg shtoi se mbetet në kontakt të ngushtë me Presidentin e Serbisë Vuçiç dhe kryeministrin e Kosovës Albin Kurti në lidhje me nevojën për të shmangur tensionet dhe rikthimin në dialog.

“NATO mbështet Dialogun e lehtësuar nga BE, dhe përpjekjet e tjera që synojnë normalizimin e marrëdhënieve midis Prishtinës dhe Beogradit, si rruga e vetme drejt arritjes së një marrëveshjeje të qëndrueshme politike, dhe stabilitetit për rajonin”, thuhet në njoftimin e NATO.

Sekretari i Përgjithshëm Stoltenberg vlerësoi bashkëpunimin NATO-BE lidhur me Kosovën si një shembull i shkëlqyer i partneritetit strategjik midis dy organizatave.

LEXONI GJITHASHTU:

• ​Kosova dhe Serbia në mirëkuptim për targat, por s’ka ende marrëveshje
• Xhavit Haliti: Marrëveshja për targat shmangu konfliktin mes palëve
• Ish-këshilltari i Edita Tahirit: Marrëveshja për targat evitoi ndërhyrjet ushtarake