​Studentët në Kosovë kundër mësimit online, kërkojnë rikthimin në auditore

Organizata Studentore Reforma në Kosovë thotë se ka nisur peticionin online për rikthim të ndjekjes së mësimit në ambientet e universiteteve publike dhe private.

Studentët shprehen se peticionin e kanë nisur së bashku me këshillat studentore në Universitetin e Prishtinës, për faktin se nuk pajtohen me vendimin e MASH dhe MSH, që mësimi të vazhdojë online edhe në semestrin tjetër.

Ata thonë se është e papranueshme që mësimi të funksionojnë online në kohën kur masat anticovid nuk respektohen nëpër kafenetë e vendit.

Gjithashtu, ato listojnë edhe një element tjetër, kur shprehen se partitë politike po organizojnë tubime pa i respektuar masat e diktuara nga strukturat shëndetësore.

Sipas studentëve, nëse nuk merren masa për të rikthyer mësimin në auditore, ato do të organizojnë protesta masive.

“Duke i parë këto arsye, është e pakuptimtë për ne që dyert e dijes të mbyllen, teksa dyert e propagandës të mbeten të hapura. Prandaj, ju njoftojmë që peticioni nuk do të jetë forma e vetme të cilën do ta ndjekim për realizim të kërkesave tona, nëse edhe pas peticionit nuk realizohen kërkesat tona për rikthim të mësimit në formën fizike, atëherë protestat masive do të jenë të pashmangshme”, thuhet në reagimin e Organizatës Studentore Reforma.