Studimi: Netët tropikale po na prishin cilësinë e gjumit dhe reduktojnë orët e tij

Ndryshimet klimatike po ndikojnë drejtpërdrejt edhe në gjumin e njerëzve. Një analizë e re zbulon se temperaturat e larta gjatë natës po i shkaktojnë botës humbjen e më shumë se 50 orëve gjumë në vit për person.

Organizata amerikane ‘Climate Central’, e cila studion ndikimin e ndryshimeve klimatike në studimin që I ka bërë periudhës 2020–2025 në nivel global ka faktuar se një person humb rreth 56 orë gjumë në vit, ekuivalente me gati 7 net të plota gjumi, për shkak të netëve të nxehta.

Analiza e më shumë se 1300 qyteteve tregoi se në pothuajse të gjitha zonat e studiuara, humbja e gjumit nga temperaturat e lidhura me ndryshimet klimatike është të paktën dyfishuar që nga vitet 1970.

Rajonet më të prekura janë Lindja e Mesme dhe Azia Juglindore, ku njerëzit humbin mesatarisht nga 55 deri në 91 orë gjumë në vit.

Në Europë, ndikimi më i madh është në jug të kontinentit. Në Napoli, njerëzit humbin rreth 51 orë gjumë në vit, në Athinë 45 orë, ndërsa në Valencia 42 orë.

Ekspertët theksojnë se mungesa e gjumit nuk është vetëm një shqetësim i përditshëm. Gjumi i pamjaftueshëm lidhet me probleme të humorit, ulje të përqendrimit, ulje të produktivitetit dhe ndikime në shëndetin e zemrës dhe sistemin imunitar.

Më të rrezikuarit janë të moshuarit mbi 65 vjeç, si dhe njerëzit që jetojnë në zona me temperatura më të larta. Studiuesit paralajmërojnë se me rritjen e temperaturave globale, edhe humbja e gjumit nga nxehtësia pritet të bëhet një problem gjithnjë e më i madh shëndetësor.