Sulm me dron në Sudan, 11 civilë humbin jetën në një treg

Të paktën 11 civilë u vranë dhe dhjetëra të tjerë u plagosën pas një sulmi me dron që goditi një treg në shtetin e Kordofani i Veriut në Sudan, sipas një organizate sudaneze për të drejtat e njeriut.

Grupi i Avokatëve të Emergjencave njoftoi se sulmi ndodhi të shtunën në mëngjes në tregun e zonës Abu Zaeima, në lokalitetin Hamrat Al Sheikh. Sipas të dhënave paraprake, përveç viktimave, dhjetëra persona të tjerë mbetën të plagosur.

Organizata dënoi sulmin, duke theksuar se ai erdhi më pak se 24 orë pasi sulme të ngjashme me dronë kishin goditur fshatra dhe një automjet civil në të njëjtën zonë. Sipas saj, shënjestrimi i civilëve dhe infrastrukturës civile përbën shkelje të parimeve themelore të së drejtës ndërkombëtare humanitare.

Grupi nuk identifikoi autorët e sulmit, por zona është përfshirë nga luftime intensive javët e fundit, ndërsa ushtria sudaneze përpiqet të rimarrë territore nga Forcat e Mbështetjes së Shpejtë (RSF).

Më herët gjatë ditës, organizata raportoi gjithashtu se katër persona u vranë dhe gjashtë të tjerë u plagosën në sulme të tjera me dronë ndaj dy fshatrave në Kordofanin e Veriut.

Ndërkohë, Kombet e Bashkuara kanë paralajmëruar për rritjen e sulmeve me dronë në rajonin e Kordofanit, duke bërë të ditur se këto sulme kanë shkaktuar të paktën 880 viktima civile në periudhën janar-prill 2026.