Sulme me raketa dhe dronë në tre shtete të Gjirit, Izraeli urdhëron evakuime në Bejrut

Ushtria izraelite tha herët të shtunën se po godiste objektiva të Hezbollahut në Bejrut, pasi kishte lëshuar më parë një paralajmërim për evakuim në shtatë lagje në periferi jugore të kryeqytetit libanez.

Izraeli ka rritur sulmet ajrore kundër Libanit në javën e tretë të luftës së tij me Hezbollahun, të mbështetur nga Irani.

Konflikti mes Hezbollahut dhe Izraelit është bërë përhapja më vdekjeprurëse e luftës SHBA-Izrael kundër Iranit, që nga momenti kur grupi militant libanez hapi zjarr ndaj Izraelit në mbështetje të Teheranit më 2 mars. Si pasojë, më shumë se 1,000 persona janë vrarë në Liban dhe mbi 1 milion janë zhvendosur.

Ndërkohë, shtetet e Gjirit raportojnë se janë sulmuar gjatë orëve të fundit. Sistemet e mbrojtjes ajrore reaguan ndaj kërcënimeve me raketa dhe dronë që vinin nga Irani, tha Ministria e Mbrojtjes e Emirateve të Bashkuara Arabe.

Homologja e saj në Arabinë Saudite tha se kishte interceptuar dhe shkatërruar tre dronë në lindje të vendit.

Ndërsa Ministria e Mbrojtjes e Kuvajtit tha se mbrojtja e saj ajrore po “merrej me sulme armiqësore me raketa dhe dronë”.

Sakaq, Izraeli ka urdhëruar banorët të largohen nga shtatë lagje në kryeqytetin libanez, Bejrut, duke treguar se sulmet mund të jenë të afërta.