Takimi i kryeministrit Rama me Blinken mbyllet me marrëveshje

Sekretari i Shtetit për SHBA, Antony Blinken dhe Kryeministri i Shqipërisë, Edi Rama kanë zhvilluar këtë të diel një takim në Bruksel, takim që është mbyllur me nënshkrimin e një marrëveshje për koordinimin mes dy vendeve në  përdorimin e teknologjisë 5G.

Sekretari Blinken tha se Shqipëria është një partner dhe aleat i SHBA dhe me këtë marrëveshje kryeministri Rama po tregon një shembull të mirë dhe për vende të tjera.

“Mendoj se po vendos një shembull mjaft të fortë për të tjerët sot, për nevojë për t’u siguruar që kur bëhet fjalë për rrjetet më të ndjeshme të teknologjisë që kemi ne, të punojmë me shitës të besuar dhe mendoj se kjo është shumë e rëndësishme dhe një mesazh shumë i fortë për t’u dërguar të tjerëve”, u shpreh z. Blinken.

“Jemi mirënjohës për punën e përbashkët që Shqipëria dhe SHBA kanë bërë së bashku përfshirë “Defender 21”. Presim që të merrni dhe detyrën në Këshillin e Sigurimit në OKB dhe mezi presim të bashkëpunojmë”, ka shtuar kreu i DASH.

Gjatë fjalës së tij, kreu i qeverisë shqiptare deklaroi se për Shqipërinë është krenari që jetë në krah të SHBA dhe e konsideroi nënshkrimin e marrëveshjes si një moment të rëndësishëm.

“Për mua dhe ne në Shqipëri është një moment shumë i rëndësishëm sepse siç besoj ju e dini kemi ndërmarrë këtë nismë nga ana jonë që prej disa vitesh dhe u kemi kërkuar vendeve të tjera në rajon që të bëhen pjesë dhe të gjithë së bashku të bëhemi pjesë për një korridor të sigurtë komunikimi dhe ta vëmë atë në duar të qytetarëve dhe institucioneve shqiptare dhe të mos lejojmë që të kompromentohet nga aktorë të tjerë që ndonjëherë janë dashakeqës”, deklaroi z. Rama.

LEXONI GJITHASHTU:

• Antony Blinken bisedë telefonike me Presidentin e Bullgarisë
• Kongresmeni Zeldin kërkon nga Blinken informacione specifike pse u shpall Berisha “non grata”
• Blinken udhëton drejt Lindjes së Mesme për të siguruar armëpushimin në Gaza