Takimi Kosovë-Serbi, bisedime në Bruksel me negociatorët e të dyja vendeve

Bashkimi Europian konfirmoi se takimi në kuadër të dialogut mes Kosovës dhe Serbisë, në nivelin e negociatorëve, do të zhvillohet të mërkurën, më 7 korrik.

Para kësaj, delegacionet e të dyja palëve do të kenë takime të ndara me përfaqësues të Bashkimit Europian.

Delegacioni i Kosovës do të takohet me përfaqësuesit e BE-së më 6 korrik, ndërsa ai i Serbisë më 7 korrik.

Delegacioni i Kosovës do të udhëhiqet nga zëvendëskryeministri Besnik Bislimi, ndërsa ai i Serbisë nga drejtori i Zyrës për Kosovën në Qeverinë e Serbisë, Petar Petkoviç.

Më pas do të zhvillohet takimi i të dyja ekipeve me ndërmjetësimin e BE-së.

Janë këto bisedimet e para që nga takimi i parë midis kryeministrit të Kosovës, Albin Kurti, dhe presidentit të Serbisë, Aleksandar Vuçic, më 15 qershor.

Në këto takime pritet  të flitet edhe për marrëveshjet e arritura deri më tani, si dhe për ecjen përpara të procesit të dialogut për normalizimin e marrëdhënieve.

LEXONI GJITHASHTU:

• Çështja e dialogut Kosovë-Serbi, Kurti dhe Brnabiç replika në Forumin e Prespës
• Philip Reeker: Vetëm njohja e ndërsjellë mes Kosovës dhe Serbisë është zgjidhje e qëndrueshme për dialogun