Takimi Kurti-Vuçiç, Borrell: Inkurajoj të dyja palët të rifillojnë dialogun

Përfaqësuesi i lartë i Bashkimit Europian, Josep Borrell deklaroi para takimit të kryeministrit të Kosovës, Albin Kurti dhe presidentit të Serbisë Aleksandër Vuçiç se sot është një ditë e rëndësishme për Kosovën dhe Serbinë.

Borrell shtoi se inkurajon të dyja palët të rifillojnë dialogun dhe të mos vonohen në arritjen e rezultateve.

“Sot së bashku me të dërguarin e BE-së për dialogun Prishtinë-Beograd, Miroslav Lajçak do të presim zhvillimin e dialogut e nivelit të lartë mes Kosovës dhe Serbisë. Është e rëndësishme që ky takim zhvillohet në të njëjtën kohë që liderët e BE takohen këtu në Bruksel me presidentin Biden. Inkurajoj të dyja palët të rifillojnë dialogun dhe të mos vonohen në arritjen e rezultateve. Nuk është një dialog i lehtë e duhet angazhim nga të dyja palët që të përfitojnë të populli i Kosovës dhe Serbisë”, u shpreh Borrell.

Sot në Bruksel ka nisur takimi i shumëpritur mes kryeministrit të Kosovës, Albin Kurti dhe presidentit të Serbisë, Aleksandër Vuçiç, me ndërmjetësim të Bashkimit Evropian.

Sipas një njoftimi të BE-së, në takim po marrin pjesë edhe kreu i diplomacisë së BE-së, Josep Borrell dhe i ngarkuari i Bashkimit Evropian për dialogun Kosovë-Serbi Miroslav Lajçak.

Për këtë takim, Kurti ka deklaruar më herët se në tryezë palët duhet të jenë të barabarta.

LEXONI GJITHASHTU:

Rinis dialogu Kosovë-Serbi, mbahet sot në Bruksel takimi i parë Kurti-Vuciç me ndërmjetësimin e BE