Takimi SHBA-Rusi për Ukrainën, Lavrov: Bisedë e dobishme, kemi arritur 3 marrëveshje

Shtetet e Bashkuara të Amerikës dhe Rusia kanë mbajtur këtë të martë në Arabinë Saudite raundin e parë të negociatave për paqe me Ukrainën.

Në takim morën pjesë zyrtarë amerikane dhe rusë, ndërkohë që evropianët janë përjashtuar nga bisedimet, ndërsa gjithashtu mungonin edhe përfaqësues nga Ukraina.

Sergei Lavrov, ministri i jashtëm i Rusisë që ishte pjesë e delegacionit në Riad, tha në një konferencë për shtyp se Rusia dhe SHBA kanë rënë dakord të krijojnë kushte për të rivendosur plotësisht bashkëpunimin midis dy kombeve.

Ministri i Jashtëm rus Sergei Lavrov tani tha se janë arritur tre marrëveshje kyçe në Riad:

1. Të emërohen ambasadorët në vendet e njëri-tjetrit sa më shpejt të jetë e mundur, për të hequr “pengesat ndaj misioneve diplomatike” duke përfshirë kufizimet në transfertat bankare në ambasada
2. Të fillojmë procesin për zgjidhjen e Ukrainës, SHBA-ja do të emërojë përfaqësuesin e saj, pastaj ne do të emërojmë tonën, thotë Lavrov
3. Të krijojmë kushte për rifillimin e plotë të bashkëpunimit tonë dhe zgjerimin në sfera të ndryshme

“Ishte një bisedë shumë e dobishme. Ne dëgjuam njëri-tjetrin dhe u dëgjuam,” tha Lavrov në konferencën për shtyp.

Lavrov tha gjithashtu se gjatë takimit u vu re se Donald Trump ishte “i pari nga udhëheqësit perëndimorë” që tha se “zvarritja e Ukrainës në NATO ishte një nga gabimet më të mëdha të Presidentit Biden”.

Ai tha Putini ka shpjeguar vazhdimisht se zgjerimi i NATO-s dhe futja e Ukrainës në aleancë do të vepronte si një “kërcënim i drejtpërdrejtë” për Rusinë.

“Çdo paraqitje e forcave të armatosura nën ndonjë flamur tjetër nuk ndryshon asgjë. Sigurisht që është krejtësisht e papranueshme,” thotë ai.

Lavrov refuzoi të komentonte pjesëmarrjen e Ukrainës në bisedime

Pasi u pyet për pretendimet e përsëritura të Zelenskit se ai nuk do të pranojë një marrëveshje paqeje midis Rusisë dhe Ukrainës pa përfshirjen e Ukrainës, Lavrov refuzoi të përgjigjej.

Lavrov tha se nuk ka nevojë të hyjë në detaje sepse këtë temë e ka trajtuar Putin në një intervistë të fundit me gazetarin rus Pavel Zarubin.

Kremlini ka thënë prej kohësh se Putini është i përgatitur të flasë me Zelensky “nëse është e nevojshme”.

Lavrov më pas përfundon konferencën për shtyp duke reflektuar se bisedimet e sotme nuk ishin “të pasuksesshme”.

LEXONI GJITHASHTU:

• Lavrov diskuton krizën e Ukrainës me ambasadorët e Amerikës Latine
• Bisedimet SHBA-Rusi, Zelensky me Erdogan: S’i dorëzohemi “ultimatumeve” të Moskës