Taksim progresiv për profesionistët, qeveria synon të arkëtojë 17 milionë euro

Qeveria parashikon që të mbledhë 17 milionë euro në vit nga përfshirja e profesionistëve të lirë në skemën e tatimit progresiv.

Parashikimi shprehet në relacionin e projektbuxhetit të vitit të ardhshëm, ndërsa si plan është i pasqyruar edhe në strategjinë afatmesme të të ardhurave, dokumenti udhëzues i financave për taksat deri në 2026.

Aktualisht, profesionistët e lirë trajtohen si biznese nga qeveria, duke u përfshirë në skemën e TVSh-së dhe tatimit mbi fitimin.

Kjo do të thotë se nëse nuk kalojnë 10 mln lekë të ardhura në vit, ata nuk paguajnë TVSh dhe nëse nuk kalojnë 14 milionë lekë nuk paguajnë tatim mbi fitimin. Shumica e profesionistëve të lirë s’i kalojnë këto shifra.

Propozimi i qeverisë i përfshin në skemën e tatimit progresiv. Një formulë e mundshme që pasqyrohet në strategjinë afatmesme të të ardhurave është që skema e taksimit të tyre të jetë mbi të ardhurat neto, pas zbritjes së 10, ose 20 për qind të shumës, që njihet si shpenzime të nevojshme.

Te profesionet e lira përfshihen avokatë, stomatologë, farmacistë, jurist dhe çdo profesion tjetër, që ushtruesi i tij e bën përmes regjistrimit si person fizik. Përfshirjen e tyre në skemën e taksimit progresiv e ka sugjeruar edhe Banka Botërore.

LEXONI GJITHASHTU

• Qeveria ‘vjel’ shtresën e mesme, 17 mln euro nga tatimi progresiv
• Dy raporte për territorialen/ PS e PD nuk bien dakord, fjalën e fundit e ka Kuvendi
• Sekuestrohen mbi 500 mijë euro të padeklaruara në Portin e Durrësit