“Të bëhet ekspertiza për fletët e pavlefshme të votimit”, presidenti Meta komenton procesin zgjedhor

“Mos u çfokusoni nga procesi i zgjedhjeve, mos u çorientoni nga lajmë të tjera. Zgjedhjet nuk kanë mbaruar,” – kështu u shpreh presidenti llir Meta, drejtuar gazetarëve.

Në një konferencë për mediat ai sqaroi se rezultati është vetëm paraprak sepse procesi i numërimit nuk ka përfunduar ende, ndërkohë që theksoi se ende nuk ka nisur procesi i ankimimeve dhe kontestimeve.

Meta përmendi emigrantët dhe qytetarët e prekur nga COVID-19 të cilëve iu mohua e drejta e votës dhe gjithashtu numrin e madh të fletëve të pavlefshme të votimit.

Teksa i cilësoi këto si elementë që kanë ndikuar në procesin zgjedhor, Meta bëri thirrje që të ngrihen dyshime për vlefshmërinë e fletëve të votimit dhe ndjekjen e procesit me transparencë.

“Pamjet filmike janë atje dhe është shumë e lehtë për të parë dhe për të bërë ekspertizën nëse një fletë ka dy kryqe dhe nëse i ka bërë e njëjta dorë apo janë dy duar të ndryshme, pra dora e votuesit, e sovranit dhe dora e komisionerit, e sekserit dhe gjithë atyre që administrojnë dhe kanë pasur qëllime për të cenuar votën dhe vullnetin e sovranit,” – u shpreh Meta.

Presidenti iu bëri thirrje të gjitha forcave politike të mos bëjnë analiza post zgjedhore por të fokusohen në përmbylljen deri në fund të zgjedhjeve të 25 prillit.