Të dënuar për vrasje dhe prostitucion, OFL u dërgon formularin 4 personave

Operacioni Forca e Ligjit u ka dërguar formularët për të deklaruar pasurinë e tyre 4 të dënuarve. Mësohet se në sitën e OFL-së janë Fatmir Kallashi, Renato Rapaj, Lulëzim Çepele dhe Shkëlqim Kurpalaj, të cilët janë dënuar për vrasje dhe shfrytëzim prositucioni.

“Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:  F. K., banues në Fier, i dënuar për veprën penale “Prodhimi dhe shitja e narkotikëve”;

R. R., banues në Fier, i dënuar për veprën penale “Vrasja me paramendim”, mbetur në tentativë;

L. Ç., banues në Tiranë, i dënuar për veprën penale “Shfrytëzimi i prostitucionit”;

Sh. K., banues në Tiranë, i dënuar për veprën penale “Shfrytëzimi i prostitucionit”, kryer në bashkëpunim, mbetur në tentativë”, thuhet në njoftimin e policisë.

Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.