Nëse diçka nuk ndryshon në rregulloret ligjore, në afërsisht 500 vjet të gjithë në Japoni mund të kenë të njëjtin mbiemër – Sato.

Një studim i udhëhequr nga Hiroshi Yoshida, një profesor i ekonomisë në Universitetin Tohoku, parashikon se nëse Japonia vazhdon të këmbëngulë që çiftet të zgjedhin një mbiemër, çdo japonez do të njihet si “Sato-san” deri në vitin 2531.

Yoshida deklaroi se parashikimet e tij bazoheshin në disa supozime, por tha se ideja ishte të përdoreshin numrat për të shpjeguar efektet e mundshme të sistemit aktual në shoqërinë japoneze dhe për të tërhequr vëmendjen ndaj çështjes, sipas Guardian.

“Nëse të gjithë bëhen Sato, mund të duhet të na drejtohen me emër ose numra. Nuk mendoj se do të ishte një botë e mirë për të jetuar”, tha ai.

Sato është tashmë në krye të listës së mbiemrave japonezë, duke zënë 1.5 për qind të popullsisë totale, sipas sondazhit të marsit 2023, dhe pothuajse dy milionë njerëz ndajnë mbiemrin, me Suzuki në vendin e dytë.

Studimi u publikua të hënën dhe përdoruesit e mediave sociale menduan se ishte një shaka. Zyrtarisht, megjithatë, studimi u publikua në mars.

Sipas llogaritjeve të Yoshida, përqindja e japonezëve me mbiemrin Sato u rrit 1,0083 herë nga viti 2022 në 2023. Duke supozuar se norma mbetet konstante dhe nuk ka ndryshime në ligjin e mbiemrit, rreth gjysma e popullsisë së Japonisë do ta ketë atë mbiemër në 2446, që do të rritet në 100 për qind në 2531.

Çiftet në Japoni duhet të zgjedhin se cilin mbiemër do të ndajnë kur të martohen, por në 95 për qind të rasteve është gruaja ajo që e ndryshon atë. Megjithatë, tabloja do të ishte ndryshe nëse qeveria japoneze do të përkulej para presionit në rritje për të lejuar çiftet e martuara të përdorin mbiemra të veçantë.

LEXONI GJITHASHTU:

• Shkaktoi zjarrin ku vdiqën 36 persona, dënohet me vdekje 45-vjeçari në Japoni
• Si produktet e duhanit me ngrohje ulën konsumimin e duhanit. Rasti i Japonisë