Të paktën tetë persona humbën jetën nga shembja e një ndërtese në qytetin indian të Lucknow, thanë sot burime policore. Ndërtesa u shemb në orën 17:00 të së shtunës me orën lokale, pasi reshjet intensive çuan në përmbytje në zonë.

Burimet policore thanë se rreth 35 deri në 40 persona ndodheshin në ndërtesë në momentin e ngjarjes, dhe trupi i fundit i gjetur u nxor rreth orës tre të mëngjesit të sotëm, transmeton New Indian Express. Sipas raportimeve, ekipet e shpëtimit shpëtuan 28 persona.

Komisioneri i policisë Amit Verma tha se nuk kishte gjasa që dikush të ishte ende nën rrënoja, megjithëse operacioni ishte ende në vazhdim.

Ekipet e Forcave Kombëtare të Reagimit ndaj Fatkeqësive (NDRF) dhe Forcave Shtetërore të Reagimit ndaj Fatkeqësive (SDRF) po vazhdojnë të pastrojnë vendin.

Ndërtesa 15-vjeçare strehonte dyqanet me shumicë të kompanive farmaceutike. Në katin e parë kishte një punishte dhe magazinë, ndërsa në katet e sipërme ruheshin materialet sanitare dhe takëm.

Shefi i Zjarrfikësve Mangesh Kumar zbuloi se hetimet paraprake sugjeruan se punimet ndërtimore ishin duke u zhvilluar në bodrumin e ndërtesës në momentin e shembjes dhe autoritetet lokale u urdhëruan të ofrojnë kujdes të menjëhershëm mjekësor për të lënduarit dhe të përshpejtojnë përpjekjet e ndihmës.

LEXONI GJITHASHTU:

• Avioni rus rrëzohet në Indi, nisin hetimet
• SHBA vendos sanksione ndaj 400 firmave dhe individëve për mbështjen e ushtrisë ruse