Të plagosurit nga aksidenti në Kroaci jashtë rrezikut për jetën, thotë deputetja

Udhëtarët e plagosur në aksidentin tragjik në Kroaci nuk janë në rrezik jete dhe aktualisht po marrin të gjithë kujdesin e nevojshëm mjekësor.

Kështu u shpreh për Euronews Albania, deputetja shqiptare në Kroaci, Emina Lekaj-Përlaskaj, e cila ka mundur t’u gjendet pranë të mbijetuarve.

“17 [të plagosur] pritet të dalin nga spitali, 15 qëndrojnë në një hotel, 3 të tjerë janë në ndjekje mjekësore intensive, por jo në rrezik jete, 2 të tjerë janë dërguar në Zagreb, ku njëri prej tyre ka pasur probleme me shpinën […] në përgjithësi jeta e tyre nuk është në rrezik, por kanë më së shumti trauma psikologjike,” – u shpreh deputetja Lekaj-Përlaskaj.

Deputetja me origjinë nga Prizereni, e cila jeton prej 30 vitesh në Rijekë të Kroacisë dhe përfaqëson pakicat prej tre legjislaturash, tha se të mbijetuarve u është mundësuar asistenca psikologjike dhe komunikimi me përkthyes, ndërsa gjatë së dielës autoritetet kanë identifikuar 6 nga viktimat.

Mëngjesin e së dielës një autobus i linjës Frankfurt-Prishtinë doli nga rruga në kufirin mes Kroacisë dhe Bosnjë e Hercegovinës duke lënë 10 të vdekur dhe 44 të plagosur.

Policia ka ndaluar drejtuesin e autobusit, i cili, sikurse tha dhe deputetja Lekaj-Përlaskaj, ishte përgjumur në timon pak pasi udhëtarët kishin kryer një pushim.

LEXONI GJITHASHTU:

• 10 të vdekur e 44 të plagosur nga aksidenti i një autobusi të Kosovës në Kroaci
• Aksidenti tragjik në Kroaci, pasagjeri tregon çastet e vështira
• Përgjumja e shoferit të autobusit mund të ketë shkaktuar aksidentin me 10 viktima në Kroaci