Të rinjtë e FRPD-së protestë për vrasjen e Klodian Rashës: Lleshaj të japë dorëheqjen

Të rinjtë e FRPD-së kanë marshuar para Ministrisë së Brendshme dhe Kryeministrisë për vrasjen e 25-vjeçarit, Klodian Rasha, i cili u vra nga efektivi i policisë.

Të pajisur me çadra, pankarta në duar, të rinjtë kanë marshuar nga një institucion në tjetrin për të ngritur zërin mbi kauzën e tyre.

Ata kanë kërkuar njëzëri drejtësi për vrasjen e 25-vjeçarit dhe dorëheqjen e ministrit Sandër Lleshaj. 

“Sandër Lleshi një ish-gjeneral i periudhës së komunizmit. Kam bindjen personale që vrasja dje e Klodianit nuk është rastësi, por vjen si karshi e 8 dhjetorit, ditës së rinisë. Që kur ka ardhur ky shtet kjo qeverisje, ka filluar duke provokuar qytetarët shqiptarë, me disa masa të paprecedentë. Vritet një 25-vjeçar, në lule të rinisë, në derë të shtëpisë, çfarë kishte ai i shkreti, disa hurma, çfarë thotë kjo që hurmat vrasin?

Është papërgjegjshmëri dhe jo efikasitet i policisë së shtetit që të bëjë këto vrasje.Turp t’i vijë Sandër Lleshit, Ne duam drejtësi për Klodianin. Ne kërkojmë sot që Sandër Lleshi të japë dorëheqjen”, u shpreh një nga të rinjtë.

Ndërsa, Belind Këlliçi hodhi akuza ndaj ministrit të Brendshëm Sandër Lleshaj, pasi tha se i ka dhënë imazhin më të keq Policisë së Shtetit.

“Lleshaj është njeriu që i ka dhënë imazhin më të keq Policisë se Shtetit. Ky është model i turpshëm i politikanit shqiptar”, u shpreh Këlliçi.  

Ngjarja e rëndë ndodhi në orët e para të mëngjesit të djeshëm në zonën e Laprakës në Tiranë, ku 25-vjeçari Klodjan Rasha u qëllua për vdekje nga efektivi i “Shqiponjave” me iniciale N.H. 

Sipas policisë i riu po kryente disa lëvizje të dyshimta, dhe pas thirrjeve të vazhdueshme ka kërcënuar efektivin, ndërkohë që ishte i armatosur.

Në këto momente efektivi qëlloi me armë zjarri në drejtim të 25-vjeçarit, i cili humbi jetën në spital. 

Vetëm pak orë pas ngjarjes efektivi u arrestua me akuzën e “Vrasjes në kushtet e kapërcimit të mbrojtjes së nevojshme”.

Lexoni gjithashtu:

Vrasja e Klodian Rashës, shokët: Nuk ka qenë i armatosur, veprimi i policisë i paligjshëm