TEC i Vlorës, ndihmës sekretari i SHBA letër përgëzimi ministres Balluku

Ndihmës Sekretari Amerikan i Shtetit për Çështjet e Europës dhe Euroazisë, z. Philip T. Reeker përgëzoi përmes një letre dërguar ministres së Infrastrukturës dhe Energjisë, znj. Belinda Balluku memorandumin për TEC-in e Vlorës.

“Me kënaqësinë më të madhe dua të përgëzoj Republikën e Shqipërisë për memorandumin e mirëkuptimit me ExxonMobil dhe Excelerate Energy për ndërmarrjen e hapave të parë për rinisjen dhe zgjerimin e operimit të termocentralit të Vlorës,” shkruhet në letrën që Euronews Albania disponon.

“Ky partneritet i ri do të kontribuojë për pavarësinë energjetike të Shqipërisë, do të vendosin Vlorën dhe Shqipërinë si një portë rajonale e energjetikës dhe do të tregojë lidershipin zotësinë e Shteteve të Bashkuara në projekte globale të energjisë,” shprehet ndihmës sekretari i SHBA.

Sipas Reeker ky është një hap i rëndësishëm drejt zgjerimit të aksesit të Europës ndaj burimeve energjetike të larmishme dhe të besueshme. Ai vlerëson se një Europë e sigurt në burimet e veta të energjisë është një partner më i fortë në arritjen e synimeve të përbashkëta në rajon dhe nëpër botë.

“Shtetet e Bashkuara e mbështesin Shqipërinë në avancimin e sigurisë europiane të energjisë. Partneriteti i thelluar mes Shqipërisë dhe SHBA vazhdon të forcohet falë përpjekjeve tuaja,” përmbyll Ndihmës Sekretari Reeker letrën e tij.