Teherani paralajmëron: Asnjë litër naftë nuk kalon Hormuzin pa lejen e Iranit

Irani ka përsëritur qëndrimin e tij të ashpër ndaj kontrollit të Ngushticës së Hormuzit, duke deklaruar se asnjë anije cisternë nafte nuk do të lejohet të kalojë pa autorizimin e Teheranit.

Deklarata u bë nga Ebrahim Rezaei, i cili theksoi se Republika Islamike nuk do ta rihapë kalimin strategjik detar pa kushte.

“Ata nuk do të jenë në gjendje të kalojnë as edhe një litër naftë përmes Ngushticës së Hormuzit pa lejen e Republikës Islamike”, deklaroi Rezaei.

Ai shtoi se çdo shenjë tërheqjeje nga ana e Iranit do të interpretohej si dobësi nga kundërshtarët e tij, veçanërisht nga SHBA.

“Nëse amerikanët shohin edhe lëshimin më të vogël ose tërheqjen prej nesh, ata me siguri do të bëhen edhe më të guximshëm”, u shpreh ai.

Ngushtica e Hormuzit konsiderohet një nga korridoret më të rëndësishme energjetike në botë, pasi një pjesë e madhe e eksporteve globale të naftës kalon përmes saj. Tensionet në këtë zonë kanë ngritur shpesh shqetësime për ndikimin në tregjet ndërkombëtare të energjisë dhe sigurinë detare.