Telashe për mandarinën, breshëri dhe pandemia çojnë në prag falimentimi fermerët

Prodhimi i mandarinës këtë vit është rritur në rajonin Xarrë-Konispol, por tregtimi i saj është i vështirë.

Efektet e pandemisë globale, e cila paralizoi tregjet brenda dhe jashtë vendit, e deri te stuhia e breshërit që disa javë më parë, kanë qenë disa prej shkaqeve që kanë sjellë një stinë të mbrapshtë.

Fermerët tregojnë se ky sezon mund quhet i mbyllur dhe me humbje ndërkohë që presin mbështetje nga shteti.

Sokol Porro është një nga fermerët që prej vitesh investon në kulturën e mandarinave. Ai e shikon me shqetësim këtë sezon të prodhimit, dhe nëse nuk ka mbështetje nga shteti mendon të emigrojë diku jashtë Shqipërisë për punë.

Por Dhimitër Kote, fermer i kësaj zone, njëherësh dhe zv. ministër i bujqësisë tregon se për të parandaluar dëmet e këtij lloji duhet të mbulohen me rrjeta të gjitha parcelat e mbjella me mandarina, si dhe futja e tyre ne skemën e sigurimit.

Në rajonin Xarrë-Konispol këtë vit pritet të prodhohen rreth 50 mijë tonë mandarina.

Tregëtimi i këtij prodhimi këtë vit duket i vështirë dhe disa herë më i ulët nga vitet e kaluara.