Tenistja Kvitova në çerek-finalet e French-Open katër vite pas sulmit me thikë që i rrezikoi karrierën

Tenistja Petra Kvitova nuk i përmbau lotët pas fitores ndaj kinezes Shuai Zhang në 1/8-at e French-Open.

Tridhjetëvjeçarja çeke u shpreh për mediat se në momentin kur përballja u mbyll, iu rikthye në mendje sulmi me thikë që vuajti katër vite më parë.

“Gjithçka më erdhi në mendje sapo mbaroi dhe u emocionova shumë, ka qenë një rrugëtim shumë i vështirë,” – tregoi Kvitova ndërsa e ndau këtë edhe me një postim në Twitter.

To be back in the quarterfinals at @rolandgarros after making my comeback here 3 years ago…

I have so many emotions going through my head, but for now I will just keep on fighting ? #couragebeliefpojd #RolandGarros pic.twitter.com/zHef2DiS1Y

— Petra Kvitova (@Petra_Kvitova) October 5, 2020

Kur ishte 26-vjeçe tenistja vuajti një sulm me thikë nga një keqbërës që i mësyri në shtëpi për ta grabitur. Ajo pësoi lëndime serioze në dorë të cilat kërkuan ndërhyrje kirurgjikale.

Mjekët i thanë se mundësitë që ajo t’i rikthehej fushave të tenisit ishin të vogla, sidoqoftë dy herë kampionia e Wimbledonit shtrëngoi dhëmbët dhe vërtetoi të kundërtën.

Ajo rifilloi stërvitjet në mars 2017 dhe dy muaj më vonë shënoi rikthimin pikërisht në turneun French-Open. Tre vite më vonë, ia doli mbanë të siguronte për herë të parë kualifikimin për në çerek-finale pas 8 vitesh mungesë.

Asaj iu deshën vetëm 85 minuta për ta mundur 31-vjeçaren kineze dhe tashmë në raundin e gjashtë do të ketë përballë gjermanen Laura Siegemund, e cila mundi Paula Badosën.