Tension në Ngushticën e Hormuzit: Marina iraniane tenton të ndalojë anijen cisternë amerikane

Anije të armatosura iraniane iu afruan sot një cisterne amerikane nafte në Ngushticën e Hormuzit dhe i urdhëruan asaj të ndalonte, mësoi Wall Street Journal (WSJ) nga burime të sigurisë, duke shtuar se cisterna më pas përshpejtoi, pas së cilës iu bashkua një anije luftarake amerikane.

Kompania e sigurisë detare “Vanguard Tech” njoftoi se tankeri, ndërsa po hynte në ngushticën strategjikisht të rëndësishme që lidh Gjirin Persik dhe Oqeanin Indian, iu afruan gjashtë anije iraniane të armatosura me mitralozë 12.7 mm dhe iu kërkua të fikte motorët dhe të përgatitej për hipje në anije.

Sipas WSJ, zyrtarët amerikanë konfirmuan se anijet e armatosura iraniane u përpoqën të ndalonin tankerin me flamur amerikan, i cili më pas u shoqërua në mënyrë të sigurt.

Sipas të dhënave të kompanisë “Kpler”, cisterna lundroi nga Emiratet e Bashkuara Arabe dhe ishte në rrugën e saj drejt Bahreinit, ku ndodhet një nga bazat kryesore detare amerikane në rajon.

Zyrtari amerikan tha gjithashtu se Irani kishte planifikuar ushtrime ushtarake me municione të vërteta në Ngushticën e Hormuzit gjatë javës, por se ato u anuluan pas një paralajmërimi nga Uashingtoni.

Zyra Britanike e Tregtisë Detare (UKMTO), e cila vepron brenda Marinës Mbretërore, tha gjithashtu se kishte marrë një raport për incidentin në Ngushticën e Hormuzit, duke deklaruar se disa anije të vogla të armatosura ishin përpjekur të ndalonin një anije tregtare që kishte refuzuar urdhrin dhe kishte vazhduar lundrimin, pa specifikuar se cilat vende ishin të përfshira.

Incidenti ndodhi në një kohë kur SHBA-të po rrisin praninë e tyre ushtarake në Lindjen e Mesme, si pjesë e përgatitjeve për opsione të mundshme ushtarake kundër Iranit, dhe sipas gazetës New York, ky veprim nga Irani konsiderohet një provokim në një kohë të pranisë së shtuar ushtarake amerikane në rajon.