Tensionet në Lindjen e Mesme, Sekretari amerikan i Energjisë: Trafiku në Ngushticën e Hormuzit vijon normalisht, kemi krijuar një korridor alternativ

Trafiku detar në Ngushticën e Hormuzit mbetet kryesisht i paprekur pavarësisht tensioneve të fundit në rajon, deklaroi Sekretari amerikan i Energjisë, Chris Wright, duke bërë të ditur se 67 anije kanë kaluar përmes këtij kalimi strategjik gjatë 24 orëve të fundit.Në një intervistë për Fox News, Wright tha se numri i anijeve që transportojnë naftë dhe produkte të saj mbetet në nivele të ngjashme me ato para përshkallëzimit të krizës në rajon.

Deklaratat e tij vijnë një ditë pasi autoritetet iraniane njoftuan mbylljen e Ngushticës së Hormuzit për shkak të tensioneve ushtarake në Lindjen e Mesme. Megjithatë, Uashingtoni e kundërshtoi menjëherë këtë pretendim, duke theksuar se qarkullimi detar vazhdon.

Wright zbuloi se korridori kryesor i lundrimit nuk është hapur ende plotësisht, por Shtetet e Bashkuara kanë krijuar një rrugë alternative më në jug për të garantuar lëvizjen e sigurt të anijeve tregtare.

“Ne kemi krijuar një korridor të veçantë në jug dhe po shoqërojmë anijet që kalojnë përmes tij”, deklaroi ai.

Sipas sekretarit amerikan, kjo masë synon të sigurojë funksionimin normal të një prej rrugëve më të rëndësishme detare për transportin global të energjisë.

Megjithatë, ai pranoi se shqetësimet për sigurinë mbeten të larta në sektorin e transportit detar, pasi shumë kompani dhe pronarë anijesh vazhdojnë të monitorojnë me kujdes zhvillimet në rajon.

Ngushtica e Hormuzit konsiderohet një nga arteriet më të rëndësishme energjetike në botë, pasi përmes saj kalon një pjesë e konsiderueshme e eksporteve globale të naftës dhe gazit natyror të lëngshëm.

Çdo ndërprerje e trafikut në këtë korridor detar ka potencialin të ndikojë drejtpërdrejt në tregjet ndërkombëtare të energjisë dhe në furnizimin e ekonomive të mëdha importuese.